Ofurgísli ríður ekki við einteyming þegar kemur að sportinu. Þótt snerpan verði seint talin hans helsta vígavopn þá bætir hann það upp með ógnarkrafti, seiglu og gríðarlegri fimni. Ofurgísli hélt uppá árlegan íþróttadag ekki fyrir löngu – Íþróttamót Ofurgísla. Á þessu móti keppir Ofurgéið í spretthlaupi við sjálfan sig, heldur bolta á lofti, tekur tækniæfingar með fótbolta og spilar körfubolta við móður sína. Öll íþróttamót Ofurgísla enda svo auðvitað á klassísku Píp-testi.
Svona mót eru ekki rigguð upp á einum degi og komu margir góðir aðilar að þessu með Ofurgéinu. Bakhjarlar og styrktaraðilar Íþróttamóts Ofurgísla er auðvitað Perform.is, Jói-okkar-Fel, Prótein Bites, Veitingastaðurinn 73, Kírópraktorstofa Íslands, World Class, Hafið fiskverslun, Flex Fitness, Under Armour á Íslandi, Markaðsstofan Hype, Iceland Fitness, Sólbaðsstofan Smart, Brasilian TAN og Hairbond á Íslandi.
Íþróttamót Ofurgísla árið 2016 var haldið í og við íþróttamannvirki Hornafjarðar við góðar aðstæður. Það er skemmst frá því að segja að Ofurgísli stóð uppi sem sigurvegari í öllum greinum og því heildarsigurvegari mótsins (Overall Champ). Helstu niðurstöður mótsins voru eftirfarandi:
- 100 metra spretthlaup – 45 sekúndur (persónulegt met árið 2016).
- Tækniæfingar með fótbolta – Lokaeinkunn 9,2 (sköpulag 9,8 – Fótagerð 8,7 – Prúðleiki 9,1 – Fegurð með bolta 9,3).
- Halda á lofti – Talningamaður tapaði tölunni í 33 (Hér var klárlega sett nýtt mótsmet).
- Körfuboltaleikur – 14-2 fyrir Ofurgísla gegn Ofurmóður.
- Píp-test – LEVEL 12, 3 (Ofurgísli elskar Píp-test).
Eftir mót fór Ofurgísli sigurreifur í foreldrahús og snæddi sigurmáltíðina – humar á alla mögulega vegu. Eina “humar-eitthvað” sem ég hef ekki fengið á Hornafirði er humar-morgunkorn. Það er væntanlega bara tímaspursmál hvenær það verður.
Ofurgísli hvetur alla til þess að heimsækja Hornafjörð í sumar. Fegurðin þarna er fjarstæðukennd. Krafturinn frá fjöllunum þarna er ótrúlegur. Og maturinn hjá mömmu og pabba ólýsanlegur.
Reykjavík, 6 maí 2016.
-Ofurgísli, maður fólksins – ykkar maður.
