Ofurgísli vill óska öllum gleðilegrar jólahátíðar. Sérstakar jólakveðjur fær allt líkamsræktarfólk, lesendur síðunnar og þeir sem hafa birst hafa í færslum hennar.
Styrktaraðilar mínir, ég elska ykkur.
Ég tók ektakvinnu mína með heim til Hornafjarðar um jólin þar sem við höfum verið í góðu yfirlæti í foreldrahúsum. Mamma heldur ennþá að ég sé 12 ára strákur sem kann ekki að elda, strauja, brjóta saman þvott eða hella mjólk í glas. Um þessa hluti og aðra sambærilega sér því hún móðir mín alfarið um. Helen vill hinsvegar meina að ég breytist í 12 ára strák þegar ég kem hingað heim. Hvort sem það er þá er hvergi betra að vera en hér á jólunum. Hérna fullhleð ég batterýin fyrir komandi átök og tek ákvarðanir um næstu stóru skrefin í lífinu, t.d. hvort ég eigi að fá mér súkkulaðiköku eða ekki. Orkan frá fjöllunum hér í kring hjálpar mér að taka slíkar ákvarðanir. Já, og ég ákvað að fá mér súkkulaðiköku.
Varðandi mataræðið og æfingar um jólin þá nenni ég ekki að skrifa neitt um það. Ef einhver hefur ekki verið duglegur að æfa eða lélegur í mataræðinu fram að jólum er alveg pottþétt að hann er ekki að æfa eða borða rétt um jólin. Sá sem hefur verið duglegur að æfa og verið samviskusamur í mataræðinu fram að jólum ætti bara að leyfa sér allt um jólin – ef hann yfir höfuð vill það. Þetta eru nokkrir dagar og langflestir fá algjört nóg af þessum lifnaðarhætti eftir nokkra daga hvort sem er. Uppleggið hjá mér er að troða í mig þangað til ég fæ ógeð. Þá er svo gott að fara í grjótharða rútínu með öllu sem því fylgir.
Förum aðeins yfir þetta í myndum.
-Ofurgísli, maður fólksins
Hornafjörður, 26. desember 2014
