Kristín er kraftmikil kona – sumir segja hana snarofvirka, en Ofurgísli veit ekkert um það. Eitt veit hann þó, það er ekkert eðlilegt við það hvað Kristín afrekar á hverjum degi. Kristín er kjarnakona. Hún stendur vaktina alla daga á hárgreiðslustofunni ZOO í Spönginni þar sem hún fléttar sig í gegnum ótal “lit og klipp” á dag – alltaf hlæjandi og síkát. En það er bara svona til að hita sig upp fyrir það sem koma skal.
Þegar upphitun og löngum vinnudegi er lokið fara hlutirnir svo að gerast hjá þessari bombu og kjarnakonu. Ef hún er ekki heima að baka eina þriggja hæða hnallþóru má líklega finna hana í Hagkaup að kaupa í eina slíka, nú ef ekki, þá er hún bókað á hliðarlínunnu að hvetja strákana sína áfram í fótboltanum. Kristín er þessi heillandi SoccerMom sem alla karla dreymir um. Kristín á og líka magnaðan kall – Ellert Ágúst Pálsson. Hann er alltaf einsog klipptur úr Esquire tízkublaðinu og saman mynda þau hjónin, börnin tvö og hundarnir glæsilega fjölskyldu sem tekið er eftir og fer ekki framhjá neinum. Fjölskyldan á heildsöluna Marmik sem flytur inn og selur hárvörur, þar á meðal lúxuslínuna PhilipB og herravaxið Hairbond. Hárvörurnar verða ekki flottari en þessar.
Þarna á milli (einhversstaðar) þá snarar þessi kjarnakona lóðunum upp í World Class – og það eru engar byrjendaþyngdir. Flestir strákarnir í ræktinni finna sér bara annað tæki eða aðra æfingu þegar Kristín mætir á svæðið og það er óheyrt að einhver strákur vilji leyfi henni að taka sett á milli hjá sér. Kristín hefur æft með Hrönn Sigurðardóttur fitness skvísu undanfarið. Þegar þær eru saman komnar í æfingasalinn er engu líkara en að tvær teiknimyndaofurhetjur hafi birst af himnum ofan. Formið skuggalegt og harkan á æfingunum fáséð.
Lífsgleðin skín úr andlitinu á Kristínu alla daga og jákvæða orkan frá henni gerir hana að einum mögnuðum karakter og fyrirmynd fyrir stelpur og stráka. Vitandi að Kristín er að fara keppa í fitness á Íslandsmótinu um páskana ákvað Ofurgísli að taka púlsinn á þessu prímakvendi.
Hvað eru svona sirka margir klukkutímar í sólarhringnum hjá þér? -Því miður allt of fáir. Ég væri svo til í að geta keypt nokkra í viðbót – bara nokkra 🙂
Hefurðu einhverntímann á ævinni slappað af uppí sófa? -Það er skemmtilegt að þú skulir spyrja að því Ofurgíslinn minn, því í gær gerði ég það í fyrsta skipti í ansi langan tíma. En ég stoppaði bara stutt við. Sófinn verður bara að þola að vera svolítið einmanna stundum.
Hvernig gengur undirbúningur fyrir Íslandsmótið? –Bara svona glimrandi vel held ég 🙂 Hahahaha, jú þetta er búið að vera ansi skemmtilegt ferli.
Í hvaða flokki keppirðu á mótinu? –Ég ætla skella mér i fitness kvenna. Klárlega enda ég -163 cm flokknum, þar sem ég mælist nú ekki mikið hærri en heilir 158 cm.
Hvernig er mataræðið hjá þér fyrir mót, svona í stuttu máli? –Þetta er algjört lúxusfæði. Mark Bargamento hefur séð um mataræðið fyrir mig og gengur það mjög vel.
- Í morgunmat fæ ég mér egg og vítamín.
- Í Millimál eru það egg, prótein-shake og stökkar og góðar hnetur
- Hádegismaturinn samanstendur af kjúlla, fisk eða einhverskonar gæða kjöti og salati. Algjör veisla alla daga.
- Seinnipartinn fæ ég mér svo prótein og fitu.
- Kvöldmaturinn er í raun einsog það sem ég fæ mér í hádeginu – semsagt áframhaldandi veisla.
- Fyrir svefninn fæ ég mér eggin mín – þau eru svo góð!
Nú áttu stóra og fallega fjölskyldu – hvernig gengur að púsla æfingum, mataræði og keppnisundirbúningi saman við fjölskyldulífið? –Skipulag, skipulag, skipulag. Það skemmir heldur ekki að eiga yndislega foreldra og mann sem aðstoða mig með börnin og það sem þarf að gera. Það er allt hægt ef skipulagið er í lagi.
Hvað ætlarðu að gera strax eftir mót? –Það er mjög einfalt og löngu ákveðið. Ég ætla að BAKA risa BOMBU, sem ég ætla borða alveg alein, hahahaha 🙂 Ég ætla halda áfram að æfa og vinna í nýjum markmiðum. Lífið heldur áfram sinn vanagang. Svo eru fermingarnar byrjaðar þannig maður skellir í svona eina til tvær greiðslur. Það verður líka gaman að að geta farið út og hitt vinkonur mínar – það er alltaf svo gaman hjá okkur. Það vantar allavega ekki verkefnin og alltaf nóg að gera. Þannig finnst mér best að hafa þetta.
Þú hefur verið að æfa með “HrikaleguHrönn” – hvernig er það eiginlega? –Ég er svo heppinn og stolt að fá að æfa með þessari yndislegu manneskju. Þvílíkur yfir-peppari og ofurkona sem hún er (kjötsystir mín). Án hennar væri ég ekki búin að ná markmiðum mínum og þeim bætingum sem nú hafa orðið. Hún er búin að kenna mér svo margt og skemmtilegt. Algjör snillingur og frábær manneskja.
Hvernig gengur að klippa allt þetta hár með svona stórar byssur sem hanga á líkamanum? –Úfffffff, það er pínu erfitt! Sérstaklega þegar ég er að blása hárið á kúnnunum, þá pumpast byssurnar allar upp, haha.
Ertu með leyfi fyrir þessum byssum? -Já, ég sótti um leyfi hjá Heiðari Snyrti. Hann gaf mér undanþágu til 2016, svo verðum við bara að sjá til eftir það.
Hverjir sponsa þig? –Sponsa? Ég hef nú ekki mikið verið að væla í liðinu með spons. Það mættu alveg vera fleiri sem sponsa mann í þessu ferli – býður sig einhver fram? Hahaha 🙂 En þeir sem sponsa mig eru frábærir aðilar. Þetta er beisik. Perform í Kópavoginum með bestu fæðubótarefnin. Nings og Hárlengingar.is. Svo skemmir ekki að hafa philipB í hárið. Við elskum falleg, sítt og heilbrigt hár.
Hvað svona sirka heldurðu sirka hefurðu bakað margar kökur á lífsleiðinni? -Þarna fórstu með það Ofurgíslinn minn. Ég held svei mér þá að ég hafi bara ekki tölu á því hve margar kökur hafa farið í ofninn hjá mér. Mögulega óteljandi margar.
Hvaða köku hefurðu þá oftast bakað Kristín mín? -Góð spurning en næstum ómögulegt að svara. Ætli það sé ekki bara djúsí súkkulaðikaka með einhverju skemmtilegu ívafi. Getur ekki klikkað og alltaf jafn gott!
Hvað er uppáhalds kakan þín? -Þetta er hinsvegar einföld spurning. Uppáhalds kakan er klárlega marengs-bomba og Oreo-ískaka með heitri karamellusósu. Það jafnast ekkert á við þetta, MMMmmmm.
Er ekki erfitt að baka allar þessar kökur í niðurskurðinum – færðu þér aldrei sneið eða sleikir kremið? -Veistu þetta hefur aldrei verið svona hjá mér! Ég baka bara einsog vindurinn, en smakka ekki einu sinni dassss af kremi. Það vill þannig til að ég á svo marga góða hérna á heimilinu sem sjá um að vera smakkarar. Menn eru alltaf tilbúnir að bjóða sig fram í að vera smakkari.
Fáum við uppskrift af hinni fullkomnu köku? -Ég er nú hrædd um það – ég ligg ekki á svona leyndarmálum. Hinn fullkomna kaka er þessi!
Þessi kaka kallast Superman Kakan. Þetta er súkkulaði-karamel marengs kaka ala Kristín Egils.
2 bollar hveiti
350 gr. sykur
85 gr. Cocoa powder
1 og 1/2 tsk matarsódi
1 og 1/2 tsk lyftiduft
2 egg
250 gr. mjólk
125 ml olía
2 tsk vanilludropar
250 ml heitt vatn eða kaffi.
Bakaðir 2 botnar. 180 gráður í 55 mínútur
Karamellan
300 gr. sykur
60 ml vatn
280 ml rjómi
30 gr. smjör
1/2 tsk salt
Smjörkrem
200 gr. sykur
4 eggjahvítur
250 gr. smjör
1 tsk vanilla
6 tsk af karamellunni
Marengs botn á milli
5 eggjahvítur
2 dl púðursykur
2 dl sykur
Hrært vel saman. Bakað í 60 mínútur á 160 gráðum
2 botnar – Getið líka sleppt honum
Ég set líka rjóma á milli með smjörkreminu. Í raun geri ég það sem ég vill hverju sinni – eftir í hvaða stuði ég er. Superman kakan er draumur í dós og í miklu uppáhaldi á mínu heimili.
Það var sannur heiður fyrir Ofurgísla að fá þetta spjall við Kristínu Kjarnakonu. Um leið og hann þakkar fyrir spjallið óskar hann Kristínu über góðs gengis á mótinu um páskana. Hann efast ekki um góðan árangur.
-Ofurgísli, maður fólksins
Reykjavík, 29. mars 2015
