Ofurgísli á góða vinkonu sem þeysist um allt eins og þruma; Þrumuásta. Stúlkan sú arna er grjóthörð, bæði að innan sem utan. Hún flækir lífið ekki að óþörfu og er alltaf ofurhress. Magnaður karakter.
Þruman heitir réttu nafni Ásta Björk og er gríðarlega öflugur fitnesskeppandi. Þrumuásta er löngu byrjuð að sanka að sér bikurum og á bikarasafnið alveg efalaust eftir að stækka mikið á næstu misserum enda stúlkan ung að árum og rétt að byrja. Þrumuásta keppti á Arnold Classic Europe í haust með góðum árangri og var í dúndurformi. Þruman er svo að fara keppa á Norðurlandamótinu í fitness og vaxtarrækt núna um helgina. Ofurgísli er sannfærður um að henni eigi eftir að ganga alveg hrikalega vel enda búin að standa sína plikt í niðurskurðinum eins og hún bezt kann.
Ef Þrumuásta hefði verið uppi á tímum Gísla Súrssonar og Gunnlaugs ormstungu hefði henni verið lýst sem einkar fagurvaxinni, vel limaðri og þótt væn ásjónu.
Arnold Björnsson ljósmyndari hlóð í nokkrar gríðarlega vel heppnaðar ljósmyndir af Þrumuástu núna um daginn. Segja má að þruman hafi sýnt nýja hlið á sér enda flestir sem þekkja hana í æfingagallanum með lóð í höndunum og heyrnatól á höfðinu. Bæði hlutverkin virðast hinsvegar henta henni með eindæmum vel.
Að lokum vill Ofurgísli óska Þrumuástu alls hins besta á Norðurlandamótinu um helgina og vonar hann innilega að hún sparki í rassa og geri gott mót.
-Reykjavík, 29. október 2014
Ofurgísli, maður fólksins.
