Ofurgísli vill byrja á að óska lesendum síðunnar, öllum Próteinhausum, Ómari Ragnarssyni og öðrum gleðilegs sumars með þökk fyrir veturinn, sem var hræðilegur – veðurlega séð. Að öðru leyti var þetta frábær vetur og verður lengi í minnum hafður fyrir margra hluta sakir. Sérstaklega verður þessi vetur minnistæður fyrir marga góða spretti í umfjöllun um kjaramál og síðan “leiðréttingu” ríkisstjórnarinnar og langtímaáhrif hennar.
Það hefur líka margt gengið á í Próteinhausaheimi hjá Ofurgísla undanfarið og hellingur framundan. Við skulum fara saman yfir þetta helsta.
I. Ofurgísli fjórfaldur Íslandsmeistari?
Það ber auðvitað hæst að Ofurgíslinn varð tvöfaldur Íslandsmeistari á Íslandsmóti um páskana. Gamlar fréttir, en góð vísa verður sjaldnast of oft kveðin. Þá hafa gárungarnir bent á að Ofurgísli sé í raun fjórfaldur meistari – enda annað árið í röð sem hann verður tvöfaldur Íslandsmeistari. Þetta er auðvitað algjörlega óskiljanlegt reikningsdæmi fyrir okkur Próteinhausana og læt ég það ógert að reyna að skilja þetta eða útskýra með einhverjum hætti. Við erum jú Próteinhausar og skiljum ekkert í svona tölum, algebru eða verðbólgu.
Það ætti hvurjum manni að vera ljóst að Konni einkaþjálfari er sportinu okkar gríðarlega verðmætur. Hann á klárlega stóran þátt í þeirri líkamsræktarsenu sem hófst fyrir nokkrum árum hér á landi og hefur aukist jafnt og þétt síðan. Konni heldur auðvitað úti iFitness heimasíðunni og hefur hann verið að birta myndbrot frá Íslandsmótinu á síðunni. Hér að neðan má sjá þegar Ofurgísli steig á svið í sínum flokki og gerði sitt besta til að keyra upp stemningu í húsið, meðal annars undir íslenska þjóðsöngnum – þetta var stórgóð skemmtun. Sjá má myndbrot frá öllum flokkum og öllum keppendum á heimasíðu iFitness. Góður Konni!
II. Ofurgísli í landsliðsferð til Konungsríkisins
Þá liggur fyrir að Ofurgísli mun ásamt ektakvinnu sinni, Ofurhellu, halda í víking og fara til Konungsríkis Spánar um miðjan maí-mánuð. Þar fer fram í Santa Susana risastórt Evrópumót í fitness- og vaxtarrækt og er ljóst að íslensk þátttaka verður með hinu besta móti – hellingur af elgtönuðum Próteinhausum á leiðinni í landsliðsferð til Spánar.
Það hefur því verið lítill tími til afslöppunar hjá Ofurgíslanum ykkar frá því hann halaði niður stóra bikarnum á Íslandsmótinu um páskana. Undirbúningur er í fullum gangi ennþá og hvergi gefið eftir. Yfir því er sko ekki að kvarta – enda fær Ofurgísli þá að sinna áhugamáli sínu af fullum þunga áfram og borða góðan mat í samræmi við það. Hver segir að það sé slæmt að fá sér þorskhnakka úr Fiskbúðinni Hafberg, hýðishrísgrjón og salat klukkan 8 á morgnana eftir góða morgunæfingu? -Það eru bara forrétttindi.
III. Brynvarður Ofurgísli
Keppnir sem þessar eru stríð og það fer enginn í stríð án þess að vera ‘undir brynju’ – það veit Ofurgísli. Hann gerði sér því ferð í Altís – verslun Under Armour í Hafnarfirði – til að vígbúast fyrir átökin og hefur í kjölfarið gefið út formlega stríðsyfirlýsingu á hendur öðrum Evrópuþjóðum. Það er greinilega mikill metnaður hjá þeim í Hafnarfirðinum því verslunin er ótrúlega flott uppsett og smekkfull af flottum vörum. Þetta var ekki ósvipað og að vera staddur í flottri verslun í útlöndum – enda er stutt í Keflavíkurflugvöllinn þarna í Hafnarfirðinum. Það gerir stemmarann bara ennþá betri að fara í verslunina.
IV. Himnasending í Próteinhausaheim – Fullnæging í dúnk.
Það er allt að verða vitlaust í Próteinhausaheimi eftir að nýtt Gold Standard Pre-Workout frá Optimum Nutrition tók magalendingu hér á landi. Dúnkarnir rjúka út einsog tívolíbombur fyrir áramótin eða brjóstarhöld við opnun Lindex verslunarinnar í Smáralind hér um árið (hver man ekki eftir því!). Ofurgísli var fljótur að verða sér úti um þetta skemmtilega efni (ekki brjóstarhöld) og varð ekki fyrir vonbrigðum. Það gaf gott pump og það besta er að pumpið helst alla æfinguna. Það jafnast ekkert á við gott pump – það segir Arnold Scwarzenegger allavega: “Having a pump is like having sex. I train two, sometimes three times a day. Each time I get a pump. It’s great. I feel like I’m coming all day.” Þar hafið þið það kæru Próteinhausar – Gold Standard Pre-Workoutið er því samkvæmt þessu ein allsherjar raðfullnæging í einum dúnk. Eða margar raðfullnægingar öllu heldur, ekki nema einhver ætli sér að klára allan dúnkinn í einu.
V. Ródtrip í Paradís
Það var algott ródtrippið sem Ofurhella- og gísli tóku til Hornafjarðar þegar litla frænka var skírð. Pabbinn og presturinn, hann bróðir minn, Stígur, sá sjálfur um athöfnina á þessum magnaða degi. Prinsessan fékk nafnið Urður Stígsdóttir. Athöfnin var fyndin, skemmtileg og falleg. Í lok athafnar dróg presturinn alveg óvænt upp hring og fékk að setja á fingur Fríðar, mágkonu. Þá varð Ofurgísli alveg ofboðslega meir – einsog 30 daga hangið Galloway nautakjöt. Dagurinn var frábær í alla staði og var veittur humar á öllum stundum og á alla mögulega vegu – í súpu, í heitum rétti, grillaður í forrétt, grillaður í aðalrétt og það var örugglega humar í kaffinu.
Það er gott að hreinsa hugann, fylla magann og stilla agann fyrir austan. Orkan frá fjöllunum, jöklunum og matnum er gríðaröflug og kemst í raun ekkert í líkingu við hana. Þarna sækir Ofurgísli alltaf sína orku fyrir komandi átök og var enginn breyting á því í þetta skiptið. Ofurgísli er því fullur af orku og meira en klár í lokahnykkinn á þessu keppnistímabili, enda stríði verið lýst yfir af hans hálfu, sbr. umfjöllun í kafla III.
VI. Ofur-súkkulaði-gísla-kökur
Þær slógu í gegn Ofur-súkkulaði-gísla-kökurnar sem draumaprins þjóðarinnar, Jói Fel, hnoðaði í. Ef einhver kann að gera súkkulaðiköku, þá er það okkar maður; Draumaprinsinn Jói Fel. Þótt það sé erfitt að meðtaka og trúa þá er þessi kaka jafngóðar og þær líta vel út. Svo verða menn alveg helmassaðir af þessu kökum. Er hægt að biðja um eitthvað meira? Í raun eru þessar Ofurgísli-súkkulaðikökur í algjöru samræmi við viðfangsefnið – þ.e. Ofurgísla; Stórar og þykkar kökur með þéttþykkum massa (súkkulaði) að utan sem innan. Mátulega harðar og stökkar að utan en þeim mun mýkri að innan. Svo skemmtilega sætar að þú færð bara ekki nóg og vilt alltaf fá meira.
Sjálfur át ég ekki allar þessar kökur, heldur fór til þeirra sem stutt hafa hvað best við bakið á mér í undirbúningnum fyrir Íslandsmótið og áfram í framhaldi af því. Það er ómetanlegt að hafa góða bakhjarla í þessu sporti. Þessir aðilar eiga því skilið eina köku – með mynd af Ofurgísla á.
-Reykjavík, 27. apríl 2015
Ofurgísli, maður fólksins
