Ofurgísli hræðist ekkert og elskar áskoranir. Þegar vinnufélagarnir hlógu og sögðu að Ofurgísli gæti ekki hjólað til að bjarga lífi sínu var bara eitt í stöðunni. Taka þátt í stærstu hjólreiðakeppni Íslands – Wow Cyclothon 2017. Ég keypti mér fallegasta reiðhjól Íslands á vormánuðum – appelsínugulur Ghost racer. Það er gaman að rúlla um á racer. Eiginlega ótrúlega gaman. Þetta er píningarsport sem hentar Ofurgísla. Reiðhjólanördarnir segja að það verði aldrei auðveldara að hjóla – þú ferð bara hraðar. Það sem er best við reiðhjólasportið er þó klárlega fatnaðurinn. Allt í spandexi og virðist reglan vera sú að því þrengri sem fötin eru því betra. Það hentar Ofurgísla líka.
Það sem hentar Ofurgísla hinsvegar illa í tengslum við hjólreiðar er að flestir reiðhjólamenn eru svona 65 kg. með reiðhjólinu sínu. Kjöt virðist ekki henta reiðhjólamönnum. Ofurgísli blæs á það enda er jafn mikilvægt að fara hratt og að lúkka vel á hjólinu. Það sjá allir sem vilja. Þess vegna lyftir Ofurgísli lóðum á morgnanna og hjólar á kvöldin. Það virðist frábær kokteill enda hef ég sjaldan verið í jafn góðu standi og akkúrat núna. Rúm 100 kíló og örfár fituprósentur. Frábært alhliða form, gott þol, mikill liðleiki og eitthvað af kjötinu.
Wow Cyclothon var ótrúleg upplifun. Þetta voru tæpir tveir sólarhringar af “full action” með frábærum liðsfélögum í Team VÍS. Það væri kannski hægt að líkja þessu við að vera 10 ára óþreytandi krakki í vatnsrennibrautagarði í tvo sólarhringa. Endalaust adrenalín, spenna, þægilegt stress, góður félagsskapur, töluverð áreynsla og ofsagleði svo eitthvað sé nefnt af þeim tilfinningum sem voru í gangi. Þetta var viðstöðulaus tilfinningarússíbani í tæpa tvo sólarhringa – það er fátt sem toppar það. Próteinhausar geta líkt þessu við að vera með full blast pump í vöðvunum stanslaust í tvo sólarhringa og til enn frekari skýringar þá hefur Arnold Schwarzenegger líkt pumpi í vöðvum við fullnægingu; “It’s as satisfying to me as, uh, coming is, you know? As, ah, having sex with a woman and coming. And so can you believe how much I am in heaven?” Ég get því mælt með Wow cyclothon fyrir alla þá sem nenna að hreyfa sig smá, borða góðan mat – og finnst fullnæging góð.
WowTúrinn var gríðarlega vel skipulagður af fyrirliða liðsins og snérist skipulagið að mestu leyti um að borða. Hvenær við ættum að borða, hvar við ættum að borða og hvað við ættum að borða. Matarplanið heppnaðist með eindæmum vel einsog annað í þessari ferð. Sjálfur stöffaði Ofurgísli sig upp af fæðubótarefnum frá PERFORM.IS og svo fengum við Jón Þór, kokkinn hjá VÍS (besti kokkur landsins) til að útbúa gríðaröflugan matarpakka fyrir hópinn. Undirstaðan í mataræðinu var þó skipulagðar máltíðir á öllum landshornum hjá fjölskyldum liðsmanna. Þannig fékk hópurinn kraftmikla kjötsúpu á Akureyri. Lambalæri ofan af Héraði með sósu og meðlæti á Egilsstöðum. Geggjaða humarsúpu á Hornafirði hjá foreldrum mínum. Loks muffins og hafragraut á Hvolsvelli. Leynivopn Ofurgísla var samt stærsti hafragrautur sem gerður hefur verið í Evrópu – 500 gr. haframjöl og byggflögur, 200 gr. whey prótein frá ON, 50 gr. möndlur og 50 gr. graskersfræ. Allt blandað í vatn og eggjahvítur. Þetta var algjör bomba og dugði yfir hálft landið. Quads og Hamstring voru að elska það.
Það ætti enginn að hafa rýrnað í ferðinni og reyndar hafði Ofurgísli miklar áhyggjur af því að sumir liðsmenn ættu eftir að bæta á sig nokkrum kílóum. Hversu svekkjandi væri að koma heim eftir að hafa hjólað hringinn í kringum landið og vera vatnaður og feitur einsog eftir jólin. Ég held að það hafi sloppið hjá flestum, þótt sumir hafi verið grimmir í Snickersinu alla ferðina.
Í Wow cyclothon hvílast menn ekki mikið – svefn mætir afgangi. Mér finnst líklegt að ég hafi sofið í kringum 1,5 klst á tveimur sólarhringum. Það getur verið erfitt, en líka gaman, ef hugarfarið er rétt.
Við vissum alltaf að liðið okkar væri ekki að fara keppa um neitt sæti og því settum við okkur markmið fyrir keppnina um að vera fyrsta tryggingafélagið í mark. Svo voru önnur smærri markmið. Markmið Ofurgísla var auðvitað að vera massaðastur í mark. Öll markmiðin náðust og því gátum við fagnað einsog heimsmeistarar við endamarkið.
Það verður gaman að taka þátt í Wow cyclothon á næsta ári með meiri reynslu, meira kjöt og í þrengra spandexi. Ég læt slatta af myndum fylgja sem fyrst og fremst sýna andann, gleðina og auðvitað smá kjöt.
Reykjavík, 27. júní 2017
-Ofurgísli, maður fólksins, bodybuilder & cyclist.
